CASTAGNE di Gianni Raffo

L'ëa 'na giornâ d'autûnno, e in ta frescûa,
faxendo quattro passi in ta natûa,
me son trovou in mëzo a ûn bosco antigo,
dove gh'andâvo spesso co 'n'amigo,
a rûspaggiâ e castagne cheite in tæra,
quand'ëmo ancon figgiêu in tempo de guæra.
A câsa ne-e boggîvan pe disnâ,
con due gambe de fenoggio e ûn pö de sâ.
Me pâ de sentî ancon ciammâ mæ moæ:
"vegnî, l'è pronto in töa, hô fæto e piæ
mangiævene due o træ sensa sprecâ,
che se n'avanse, servan pe çenâ".
Väna illûxion, inûtile speransa,
quande s'ha famme de röba no n'avansa;
e â seia, gh'ëa rostïe pe cangiâ,
pe risparmiâ anche l'ægua, l'êuio e a sâ.
Riveddo ancon mæ poæ co-e fâ ballâ,
in te 'na poæla vëgia e pertûzâ.
O l'è ûn frûto nostrâ, sensa preteize,
ûn frûto fæto in pô comme o zeneize,
serrou drento a 'na rissa, quæxi ascoso,
ma con in chêu tanto dôçe e generoso,
che tanto o n'ha aggiûttou in ti momenti,
quande gh'ëa solo da famme sotta i denti.
Me son accucciou, me n'ho insernûo due o træ,
ma i mæ figgiêu no me l'han manco ammiæ.


Gianni Raffo - Dialetto di Lavagna (Ge)


CASTAGNE

Era un giorno d'autunno, e nella frescura,
facendo quattro passi nella natura,
mi son trovato in mezzo a un bosco antico,
dove andavo spesso con un amico,
a spigolar castagne cadute in terra,
quand'eravamo ancora bambini in tempo di guerra.
A casa le facevano bollite per pranzo,
con due costi di finocchio e un po' di sale.
Mi par di sentire ancora mia madre chiamare:
"venite, è pronto in tavola, ho fatto le pelate
mangiatene due o tre senza sprecare,
che se ne avanza servono per cenare".
Vana illusione, inutile speranza,
quando si ha fame di roba non ne avanza;
e alla sera, caldarroste per cambiare,
per risparmiare anche l'acqua, l'olio e il sale.
Rivedo ancora mio padre che le fa ballare,
in una padella vecchia e bucata.
È un frutto nostrano, senza pretese,
un frutto che assomiglia al genovese,
chiuso dentro un riccio, quasi nascosto,
ma con un cuore tanto dolce e generoso,
che tanto ci ha aiutato nei momenti,
quando c'era solo la fame sotto i denti.
Mi son accucciato, ne ho scelto due o tre,
ma i miei figli non le hanno manco guardate.