INSALATA MISTA SANREMASCA di Vincenzo Jacono

Se vui i vurei l'insalata ideale

Ch'a daghe a l'œiu a piaixente vixiun

De ciü curui d'in verdu natürale,

Ma spareschi de ton e gradassiun;

Ch'a daghe aa buca a durse variassiun

De ciü güsti, ciacün d'in bon speciale,

E tüti inseme l'ìntima espresciun

D'in po' du nostru regnu vegetale,

Mes-ciai richeta, scaparui, peirin

E sèrbixe; cundì cun œriu fin,

Aixeu e sa. Mangiai sta rarietà

Ünica au mundu: a ciache furchetà

I ve sentì beati, e i v'acurzei

Che a ve fa pru fin ae unge di pei.

Vincenzo Jacono – Dialetto di Sanremo

INSALATA MISTA SANREMESE

Se volete l'insalata ideale

Che dia all'occhio piacevole visione

Di più colori d' un verde naturale

Ma dissimili di tono e gradazione;

Che dia alla bocca la dolce variazione

Di più gusti, ciascuno di una bontà speciale,

E tutti insieme l'intima espressione

Di un po' del nostro regno vegetale,

Mescolate rucola, caccialepri, spinaccio selvatico,

E cicerbita; condite con olio fine,

A ceto e sale. Mangiate questa rarità

Unica al mondo: ad ogni forchettata

Vi sentite beati, e vi accorgete

Che vi delizia fino alle unghie dei piedi. 

SABBO ZENEISE 18.8.18

In sce Zena a tocchi

doppo a tristessa de campann-e

soggiottan e scirenn-e do porto

e cianin cianze l'organo

a-a filla de lustre cascie

neghæ in ta sciôea da pietæ

tramêzo a facce de prîa

sensa ciu' lagrime.

...e quella cascia gianca

davanti a-e ätre

comme prõa che a sguära

o mâ do dô.

Sergio "Bibi " Marini – Dialetto di Genova

SABATO GENOVESE 18.8.18

Su Genova spezzata

dopo le meste campane

singhiozzano sirene in porto

e piange sommesso l' organo

alla fila delle lucide bare

annegate nei fiori della pietà

tra I volti di pietra

senza più lacrime.

E quella bara bianca

davanti alle altre

come prua che fende

il mare del dolore.

ZUGNO DO MÆ TEMPO di Danila Olivieri

Appenn-a vëi paiva stæ,
e zà 'na maccaia de neggia
a l'ingheugge a liggia
mentre a-a çenie do çê
o ghe scappa 'na zimma...
...Zugno figgieu spenscieròu
l'ëa fughe axillæ a sciòu sospeiso,
dosci lerfe rosse de çexe
e prïe da gèa descäse e cäde.
Zinzannàva inte l'arbaxïa
'na scinfonïa de canti e de trilli
e e rovee coàvan i nïi
che de parpezzi fremméivan
comme o cheu figgieu.
Poi, quande l'endego lungo da seja
o s'arrendeiva a-o scuo,
e ciæbelle recammàvan
sentê de lummi e de silençio
mentre a caésa do vento
da neutte a dilatava l'incanto.
Smarrïi òmai i sentê figgieu de luxe
ma a mi o basta 'n fî de vento,
imporpòu de ödoî de bosco,
pe fâ mesciâ into cheu l'incanto
do zugno do mæ tempo.

Danila Olivieri – Dialetto genovese del Tigullio

GIUGNO DEL MIO TEMPO

Appena ieri pareva estate

e già una maccaia di nebbia

avvolge la balza

mentre alla cenere del cielo

sfugge una favilla.
...Giugno fanciullo spensierato

era fughe vivaci a fiato sospeso

dolci labbra rosse di ciliegie

e sassi del greto scalzi e caldi.

Indugiava nella brezza

una sinfonia di canti e trilli

e le querce covavano i nidi

che di palpiti fremevano

come il giovane cuore.

Poi , quando il viola lungo della sera

s'arrendeva al buio

le lucciole ricamavano

sentieri di lumi e silenzio

mentre la carezza del vento
della notte dilatava l'incanto.

Smarriti ormai i sentieri fanciulli di luce

ma a me basta una bava di vento

imbevuto di odori di bosco,

per far muovere nel cuore l'incanto

del giugno del mio tempo.

“MADEMOISELLE” di Vincenzo Balbis

Ti éiri sciurtìa ciangendu da-a stassiun

cun i öji rusci e ascì despentenà;

a me sun acustau a tü, pe' cumpasciun,

percouse ti me paixevi désperà.

“Posso aiutarLa, forse, Signorina?”

In franséese ti m'hai rispostu: “ Non, pourquoi?”

ma apena a t'ho ditu “Mademoiselle”

u l'è cume se ti te fusci descià.

A t'ho purtà in giru, fin in sc'i u mö,

ti te sfugaivi, u se desgrupava u cö!

Tü, Mademoiselle,

straca pe' i criùi e e liti di parenti,

p'a-a vita grama, i cianti e i stenti,

ti éiri scapà d'in Fransa, da Sospèl,

ma a t'ho cunvinta a-a fin

da-i töi de riturnà,

percouse 'stu tò azardu

u i avereva mesci in sce l'atenti

e faiti, de següru raixunà.

Cuscì ti sei partìa

e int'u dime “ciau”

in baixu in sce ina masca ti m'hai dau...

Avura ti sei dona e forsci nona;

ma se ancù ancöi lezu in sc'in giurnale

d'ina zuena che da cà a l'è scapà,

a pensu a tü,

garsuna sensa nome de Sospèl,

ch'a te ciamavu sulu: “Mademoiselle!”

Vincenzo Balbis – Dialetto di Sanremo

“MADEMOISELLE”

Eri uscita piangendo dalla stazione

con gli occhi rossi e anche spettinata;

mi sono avvicinato a te, per compassione,

perché mi sembravi disperata.

“Posso aiutarLa, forse, Signorina?”

In francese mi hai risposto: “No, perché?”

ma appena ti ho detto “Mademoiselle”

è come se ti fossi svegliata.

Ti ho portata in giro, fin sul molo,

ti sfogavi, si scioglieva il cuore!

Tu, Mademoiselle,

stanca per le urla e le liti dei parenti,

per la vita grama, i pianti e gli stenti,

eri scappata d'in Francia, da Sospel,

ma ti ho convinta alla fine

dai tuoi di ritornare,

perché questo tuo azzardo (di scappare)

li avrebbe messi sull'attenti

e fatti, di sicuro, ragionare.

Così sei partita

e nel dirmi “ciao”

un bacio su di una guancia mi hai dato...

Adesso sei donna e forse nonna;

ma se ancora oggi leggo sul giornale

di una ragazza che da casa è scappata,

penso a te,

ragazza senza nome di Sospel

che ti chiamavo solo: “Mademoiselle!”

L' ÈRBO DE NOXE di Renzo Ferrero

L' anno  passòu

(vers' a  meitæ  de  marso)

remondando  o  giardin,

tra  mondaggia  e  feugge  secche

in  te 'n  canto  gh' ëa  'na  noxe

co-a  sgûscia  mëz' averta

missa  lì  da  quarche  ratto.

Da-o  sò  ghælo  sperunsìo

ghe  sciortiva  n' a  gambetta

lunga  appenn-a  'n  pâ  de  citti

con  due  feugge  piccinette :

a  nasciòn  de 'n  neuvo  noxe !

L' ò  piggiâ e  l' ò  assotterrâ

in  te 'n  posto  'n  mëzo  a-o  pròu.

Doppo  n' anno  quell' erboëto

o  l' è  cresciû  de  'n  parmo  bon

e  sciccomme  o  tegno  d'euggio

ò  scoverto  con  piaxei

ch'a  l' à  misso  zà  sei  feugge..

Mi  no  sò  se  faiö  a  tempo

a  vedde  e  noxe  de  quell' èrbo

ma  de  questo  no  m' importa

perchè  sò  che  a  l' incontrajo

va  ognidûn  pe-o  sò  destin...

Me  saiéiva  invece  cäo

che  fra  tanti  e  tanti  anni

quarchedûn  se  ricordesse

che  de  quello  grosso  noxe

mi  gh' ò  fæto  'n  pò  da  puìn!

Renzo Ferrero – Dialetto di Genova

IL  NOCE     

L' anno  scorso 

(verso  la  metà  di  marzo), 

ripulendo  il  giardino, 

tra  ramaglie  e  foglie  secche 

in  un  angolo  c'era  una  noce 

con  il  guscio  mezzo  aperto 

nascosta  lì  da  qualche  topo.

Dal  suo  gheriglio  appassito 

usciva  un  germoglio 

lungo  appena  un  paio  di  centimetri 

con  due  foglioline : 

lo  spuntare  di  un  nuovo  noce.

L' ho  presa  e  l' ho  interrata 

in  un  posto  in  mezzo  al  prato.

Dopo  un  anno  quell'alberello 

è  cresciuto  di  venti  centimetri 

e,  siccome  lo  tengo  d' occhio,

ho  scoperto  con  piacere 

che ha  già  messo  sei  foglioline.

Io  non  so  se  farò  a  tempo 

a  vedere  le  noci  di  quell' albero, 

ma  di  questo  non  m' importa 

perché  so che  all' incontrario 

va  ognuno  per  il  suo  destino...

Mi  piacerebbe  però 

che  fra  tanti  e  tanti  anni 

qualcuno  si  ricordasse

che  di  quel  grosso  noce 

sono  stato  un  po'  il  padrino !!

TRAMUNTI di Eugenia Faraldi Bregliano

Tranchila a se faixeva a seirana

candu chelu su che u l'eira puntau là

duve int'e freide ma ciaire matin de Zenà

u prufilu da Corsega u se puixeva gardà,

deré ae culine du punente u se vegniva a pusà.

Ina campana a se sentiva sunà.

A l'eira chela da geixeta

da Madona du Bonmuschetu

che da aveixin a l'aixeva

in cunventu de frati.

Chelu son u l'eira u segnale,

finiu de travajà l'ura a l'eira arivà

du Segnù andà a pregà.

Cantu tempu u l'è passau

da candu garseunta cun i mei

a piaimu parte a chele funsiui,

nu gh'è ciü a geixeta,

cheli frati, i mei.

Au postu de chela garsuneta

u gh'è ina vejeta

che a l'aspeita u tramuntu,

arregurdandu u so longu passau

e tüte e couse bèle e brüte

che au mundu gh'è stau.

Eugenia Faraldi Bregliano – Dialetto di Sanremo

Classe 1905 – Poesia scritta nel 2000

TRAMONTI

Tranquilla si faceva la serata

quando quel sole che era spuntato là

dove nelle fredde mattinate di gennaio

il profilo della Corsica si poteva guardare,

dietro alle colline del ponente veniva a posarsi.

Una campana si sentiva suonare.

Era quella della chiesetta

della Madonna del Buonmoschetto

che vicino aveva

un convento di frati.

Quel suono era il segnale,

finito di lavorare l'ora era arrivata

del Signore andare a pregare.

Quanto tempo è passato

daquando bambina con i miei

partecipavamo a quelle funzioni,

non c'è più la chiesetta,

quei frati, i mei.

Al posto di quella bambina

c'è una vecchietta

che aspetta il tramonto,

ricordando il suo lungo passato

e tutte le cose belle e brutte

che al mondo ci sono state.

AVIÉI CRIÒU di Sandro Patrone

Genova - Via Madre di Dio

Aviéi criòu. Ma chi v'aviä sentïo,

vëge case de Via Maddre de Dio?

Ciù de dexe paranchi

a scaregâ frecciamme;

o 'na cascata

de un tonnëo de carbon

drent'a 'na stiva;

o un magnan

e poi 'n'ätro e çento ancon

a piccâ martellæ...

...ben! L'é pëzo o bordello

che ancheu fan i dinæ.

E intanto aviéi criòu

pe ogni vostra ferïa,

ma quella vostra voxe

ben pochi l'han sentïa.

Sandro Patrone – Dialetto di Genova

AVRETE GRIDATO

Avrete gridato. Ma chi vi avrà udite,

vecchie case di Via Madre di Dio.

Più di dieci paranchi

a scaricare rottami;

o una cascata

di una tonnellata di carbone

dentro a una stiva;

o un calderaio

eppoi un altro e cento ancora

a vibrare martellate...

...ebbene! È peggio il fragore

che fanno oggi i denari.

E intanto avrete gridato

per ogni vostra ferita,

ma quella vostra voce

ben pochi l'avranno sentita.

I SCAPARUI di Vincenzo Jacono

S'i avei bon güstu e a dentaüra sana,

L'insalata che giüstu a fa pe' vui

A l'è chela nustrà de scaparui

Specialità de flora matüssiana.

Spesseghèndu intu zerbu e inta riana,

Dunde tüti i pon èssighe padrui,

Andàighe, anun, rancàine a pügnurui,

Du vostru berculun fàine cabana.

Cundiiri cuscì freschi arecampai,

E dàighe a mente: apena batezai

I s'aretissa rèdeni, i ve grila

Cume a dive dau rœu da fiamanghila:

- “Se ti n'atasti nui, l'è a vota che

E laitüghe ti e lasci au verdüré” -.

Vincenzo Jacono – Dialetto di Sanremo

I CACCIALEPRE

Se avete buon gusto e la dentatura sana,

L'insalata che giusto fa per voi

E' quella nostrana dei caccialepre

Specialità della flora matuziana.

Abbondando negli incolti e nei ritani,

Dove tutti possono essere padroni,

Andateci, via, sradicatene a manciate

Della vostra sacca fate capanna.

Conditeli così freschi appena raccolti,

E fateci caso: appena apersi d'olio, aceto e sale

Si rizzano vigorosi, ardono d'impazienza

Come a dirvi dal cavo del lungo piatto (da portata):

- “Se tu ci assagi è la volta che

Le lattughe le lasci al verduriere”-.

DIU di Mario Saredi

Avù,

hon fenìu.

Me fa mà

in dìu.

Pe’ furtüna

u nu l’è

Elu.

Sèira l’hon ciamàu,

l’hon rengrassiàu,

cùme tüte e matìn

e sèiràe.

Nu me pösciu indurmì

se nu’ u tègnu

in po’ cun mì.

U nu l’è mài stàncu

de sentì

a mèixima cansùn.

U nu ciòcca e màe

ma u sòu scì,

u l’è cun mì.

Mario Saredi – Dialetto di Camporosso

DIO

Ora,

ho finito.

Mi fa male

un dito.

Per fortuna

non è

Lui.

Ieri sera l’ho chiamato,

l’ho ringraziato,

come tutte le mattine

e serate.

Non mi posso addormentare

se non lo tengo

un  po’ con me.

Non  è mai stanco

di  sentire

la stessa canzone.

Non applaude

ma il suo si,

è qui.