martedì 27 ottobre 2015

VÈNTU D'UTUNU ( E FÖJE SECHE) di Dino Ardoino


Scicume u fréidu u sta dandu a durmìa
ai èrburi, d'utunu u vèntu u fa
caze e föje seche, u e fa vurà,
u e spantenéga e turna u se e repìa.

E u l'amüja e ancù d'in sa e d'in là
cun in bufurun de növu e u e descurchìa,
u l'aissa, u l'asbascia, u e porta via
e a son de sciusci ascì u e fa balà.

Fin ch'i finisce a tochi e tuchetin
e in purve adiritüra a fa da ingrasciu
bon pe' a tèrra de l'ortu e du giardin:

a natüra a nu asgàira ren. E a lasciu
a chi léze de fasse in penscïerin
perché a nu fassu de cisch'èrba in fasciu,

sulu a digu che tütu u vèn a taju
fina l'ungia ch'a sèrve a mundà l'aju.



Dino Ardoino – Dialetto di Sanremo


VENTO D'AUTUNNO (LE FOGLIE SECCHE)

Siccome il freddo sta dando l'anestesia
agli alberi, d'autunno il vento fa
cadere le foglie secche, le fa volare,
le sparpaglia e nuovamente se le riprende.

E le ammucchia e ancora di qua e di là
con una folata di nuovo le disperde.
Le alza, le abbassa, le porta via
e a suon di soffi le fa anche ballare.

Finché finiscono a pezzi e pezzettini
e in polvere addirittura a far da ingrasso
buono per la terra dell'orto e del giardino:

la natura non spreca nulla. E lascio
a chi legge di farsi un pensierino
poiché non faccio d'ogni erba un fascio,

solo dico che tutto viene a taglio
anche l'unghia che serve a sbucciare l'aglio.

Nessun commento: