sabato 14 marzo 2015

O FIORE INTO GÒTTO di Edoardo Firpo


Gh'ëa un çê freido e lontan
de d'äto a-o bòsco instecchïo,
ma inti cianelli zà verdi
s'arviva i còlchici lilla;
a-i pê de qualche muagetta
spontava a primma viovetta.
Campann-e vegnìvan à sciammi
da-e lontananse di monti,
da-i orizzonti di anni,
quande me paiva che o mondo
nasciùo o fosse con mi.

Ægue de primmaveia
sott'a-e rammette fiorïe,
comme me paiva che allöa
cantasci solo pe mi!

Oh, carovane de nuvie
calme a-i tramonti in sciô mâ
e contemplæ dietro a-i veddri,
quanto m'æi fæto pensâ!

Malinconia,
comme ciù fïto do tempo
ti desfi e cöse do mondo!

Ma e primmaveie ritórnan
e mi rinascio con lô.

Son comme o fiore into gòtto
che mentre o meue cianin
pe ògni sô che ritorna
o se repiggia un pittin.


Edorado Firpo – Dialetto di Genova

IL FIORE NEL BICCHIERE

C'era un cielo freddo e lontano
sopra il bosco stecchito,
ma nei pianori già verdi
si aprivano i colchici lilla;
ai piedi di qualche muricciolo
si apriva la prima violetta.

Campane venivano a sciami
dalle lontananze dei monti,
dagli orizzonti degli anni,
quando mi pareva che il mondo
fosse nato con me.

Acque di primavera
sotto i rami fioriti,
come mi pareva che allora
cantaste solo per me!

Oh, carovane di nubi
calme ai tramonti sul mare
e contemplate dietro ai vetri,
quanto m'avete fatto pensare!

Malinconia,
come più presto del tempo,
distruggi le cose del mondo!
Ma le primavere ritornano
e io rinasco con loro.

Sono come il fiore nel bicchiere
che mentre muore lentamente
ad ogni sole che torna
si riprende un pochino.


Nessun commento: