O SCEMMO DO PAISE di Aldo Acquarone

I

O l'è un meridionale longo e sciuto 
ch'o sa fâ un pò de tutto, ma o travaggia 
solo quande o l'è pròprio mâ riduto, 
do resto o dòrme ò o pesca longo a spiaggia. 
De vòtte, tra e risate da marmaggia, 
o fa discorsci privi de costruto, 
ma se ghe tïan de gnære o no s'arraggia, 
ansi o solleva o brasso, o fa un saluto 
e o se ne torna à bòrdo do sò gosso. 
Quande gh'è da mangiâ o ghe dà drento, 
donque o se beive un fiasco de vin rosso 
e o canta accompagnàndose co-o remmo. 
Con tutto questo, à véddilo contento, 
no sò perché, ma dìxan ch'o l'è scemmo!

II

Quande un mattin d'inverno l'anno scorso 
l'an trovòu mòrto drento o baraccon, 
dovve o viveiva solo comme un orso, 
o Scìndico, fedele a-a tradiçion, 
o l'à propòsto a-a Gionta inte 'n discorso 
che a càrega de scemmo e a sovvension 
a foïse dæta in base à un concorso 
pe tìtoli, valiæ da-a commiscion. 
Presto dïto! De scemmi ghe n'ëa tanti, 
e s'è misso de mezo Don Libòrio, 
o partïo, deputæ, altoparlanti... 
Tanto che, pe evitâ un gròsso guaio, 
comme scemmo do paise provvisòrio 
te gh'an mandòu da Romma un commissäio.

Aldo Acquarone – Dialetto di Genova

LO SCEMO DEL PAESE

I

È un meridionale lungo e asciutto

che sa fare di tutto, ma lavora

solo quando è proprio mal ridotto

altrimenti dorme e pesca lungo la spiaggia.

A volte, fra le risate della marmaglia

fa discorsi senza senso

ma se gli tirano pernacchie non s'arrabbia

anzi solleva il braccio, fa un saluto

e se ne torna a bordo del suo gozzo.

Quando c'è da mangiare ci dà dentro,

sennò si beve un fiasco di vino rosso

e canta accompagnandosi col remo.

Con tutto ciò, a vederlo contento,

non so perché, ma lo chiamano scemo! 

II 

Quando un mattino d'inverno, l'anno scorso

l'hanno trovato morto nel baraccone

dove viveva solo come un orso,

il Sindaco, fedele alla tradizione,

ha proposto alla Giunta in un discorso

che la carica di scemo e la sovvenzione

fossero assegnate in base ad un concorso

per titoli vagliati da una commissione.

Presto detto! Scemi ce n'erano tanti

e ci si è messo di mezzo Don Liborio,

il partito, deputati, altoparlanti...

Tanto che, per evitare un grosso guaio,

come scemo del paese provvisorio

gli hanno mandato da Roma un commissario.