SCIÜ A MÜRAGLIÉTA di Roberto Rovelli

Int’u giru d’u Marinà, giüstu passà l’auřìva

e dopu u cancelétu d’a scařa de Francìsca,

là gh’eira u nostru postu, a nostra müragliéta.

A nu’ l’eira famusa cume chela de Alassiu

e, de següru, a nu’ l’ava mancu ina cansùn.

Ma a l’eira a müragliéta d’a nostra zuventù;

in lögu pe’ truvàsse, u nòstru pecìn cantùn.

Assétài tüti in fiřa, sciü a nòstra müragliéta,

amu passàu bèn bèn de ure a mirà u tràfegu

che, lentu, a fatiga u l’ansciava int’a muntà,

inte chele longhe cùe d’u mercàu d’u vénardì,

fra nìvuře de füme e audù de frižiùn brùxà.

Sciü ‘sta müragliéta amu pigliàu e prime cöte,

fàu amiciçie, ma inscì patìu caiche delüxiùn.

A cheli tempi, u “laptop” u nu’ l’éxisteva

e, pe’ u ciü, l’eira ràira fina a teřevixùn.

Nu’ gh’eira ancù a “e-mail”, ma gh’eira u pustìn; 

nu’ savevimu de “Twitter” o mancu de “Instagram”

e nu’ àvimu ancù “facebook” o u teřefunìn.

Ma, a bon contu, se semu ustessu désbrügliài,

scampàndu i incomudi d’a vita pe’ u camìn.

Ben, ancöi a nòstra müragliéta a l’è ancù là,

giüstu passà l’auřiva, int’u giru d’u Mařinà.

Nisciün ciü u s’àsseta sciü ‘sta vecia müragliéta; 

i zùveni i nu’ l’an ciü tempu de pensà au passàu,

vivendu int’u mumentu cu’a spéransa d’u dumàn.

L’è cuscì che, Francìsca già da ani a se n’è andà                                     

e u cancelétu, avù, u cuntügna a restà serràu.

Roberto Rovelli – Dialetto de La Mortola

SUL MURETTO

Nella curva del Marinà, appena passato l’ulivo

e dopo il cancelletto della scala di Francesca,

là c’era il nostro posto, il nostro muretto.

Non era famoso come quello di Alassio,

e, certamente, non aveva neppure una canzone.

Ma era il muretto della nostra gioventù;

un luogo per trovarci, il nostro piccolo angolo.

Seduti tutti in fila, sul nostro muretto,

abbiamo passato molte ore a guardare il traffico

che, lento, a fatica ansimava nella salita,

in quelle lunghe code del mercato del venerdì,

tra nuvole di fumo e odore di frizione bruciata.

Su questo muretto abbiamo preso le prime cotte,

fatto amicizie, ma anche sofferto qualche delusione.

A quei tempi, il “laptop” non esisteva

e, per lo più, era rara persino la televisione.

Non c’era ancora l’“e-mail”, ma c’era il postino;

non sapevamo di “Twitter” o neppure d’“Instagram”

e non avevamo ancora “facebook” o il telefonino.

Ma, ad ogni modo, ci siamo lo stesso sbrogliati,

sopravvivendo i disagi della vita lungo il cammino.

Bene, oggi il nostro muretto è ancora là,

appena passato l’ulivo, nella curva del Marinà.

Nessuno più si siede su questo vecchio muretto;

i giovani non hanno più tempo di pensare al passato,

vivendo nel momento con la speranza del domani.

È così che, Francesca già da anni se n’è andata

e il cancelletto, ora, continua a rimanere chiuso.