A FONTANN-A di Alessandro Guasoni

Q

A nuvia ch'a se mescia verso donde
scenta e öe do releuio, a tocca e arcæ
gianche de l'ærta lögia sovia e onde;
l'ægua a strixella lenta da-e canæ

de 'na fontann-a; un sò seunno de sô
arba 'na veia a scöre; fa retorno
tutte e cöse inta mente do Segnô,
quelle che sccioìsce onde comensa o giorno.

Penscëo de Dê, che da pe lê o s'ammìa,
che da pe lê o se pensa e o crea o mondo
into spegio d'amô de giometrìa,
ch'o l'é lògica e o reze o çê e o prefondo.

Ne vegne un senso d'avventùa da lê,
comme un ciæo de grandixe a-e stigge pòrte
ch'ammìan de de là, e o segna i sentê
e o l'inscia o cheu, da maniman ciù fòrte.

Zù da-a fontann-a l'ægua a cöre verso
i anni passæ, crestallo onde se spegia
e o se spartisce à gæli l'universo,
inte 'n canto allugòu da çittæ vegia.

Alessandro Guasoni – Dialetto di Genova

Poesia vincitrice del 1° Premio al concorso “Ciavai” 2014

LA FONTANA

La nuvola che si muove verso dove

spariscono le ore dell'orologio,

tocca le arcate bianche dell'alta loggia sulle onde;

l'acqua scorre lenta dalle cannelle

di una fontana; un suo sogno di sole

una vela candida rincorre; ritornano

tutte le cose alla mente di Dio,

quelle che sgorgano dove inizia il giorno.

Pensiero di Dio, che contempla sé stesso,

che pensa sé stesso e crea il mondo

nello specchio d'amore di geometria,

che è logica e regge il cielo e l'abisso.

Da lui viene a noi un senso d'avventura,

come un chiarore di grandezza alle snelle porte

che guardano oltre, e segna i sentieri

e gonfia il cuore, sempre più forte.

Giù dalla fontana l'acqua corre verso

gli anni trascorsi, cristallo ove si specchia

e si divide a spicchi l'universo,

in un angolo riposto della città vecchia.