SPIRITUAL PE 'N FORNÂ di Giuliano Balestreri

Mi no veddo l'öa
che s'arve o bar
pe-o primmo caffè
ch'o segge bello fòrte
(o saià comme 'n lampo de sangue
in sciâ mæ faccia, Pierrot ò mòrte).

Mi no veddo l'öa
che s'arve o barcon
da bionda do terso cian
(sciô de fænn-a, sciuscia via,
veuggio vedde ancon ciù mëgio
scollatùa ò camixa finn-a).

Mi no veddo l'öa
de riconosce fra i plàtani dösci
o casòtto di giornali,
o Ménego de l'Ansaldo
(operaio primmo turno),
o cartellon da cocacola,
l'infermëa ranga de San Martin
e meno barlumme inta neutte de feugo
(attento! o forno o t'aspëta,
o l'è sempre cädo).

Mi no veddo l'öa
che e luxe de Portofin
àggian à tremâ tramezo a-e case grixe,
sciammette incanti capriçi
che se pèrdan inta mattin
insemme a-e zimme do forno,
ponto fermo do mæ destin.

Giuliano Balestreri (1906-1969) – Dialetto di Genova

SPIRITUAL PER UN FORNAIO

Io non vedo l'ora

che si apra il bar

per il primo caffè,

che sia ben forte

(sarà come un lampo di sangue

sulla mia faccia, Pierrot o morte).

Io non vedo l'ora

che si apra la finestra

della bionda del terzo piano

(fior di farina, soffia via,

voglio vedere ancora meglio

scollatura o camicia fine).

Io non vedo l'ora

di riconoscere fra i platani dolci

il chiosco dei giornali,

Menego dell'Ansaldo

(operaio primo turno),

il cartellone della Coca Cola,

l'infermiera zoppa di San Martino

e meno barlume nella notte di fuoco

(attento, il forno ti aspetta,

è sempre caldo).

Io non vedo l'ora che le luci di Portofino

abbiano a tremare tra le case grigie,

fiammelle incanti capricci

che si perdono nel mattino

insieme con le scintille del forno,

punto fermo del mio destino.