U MAIXÉ di Pia Viale

Dedicata a Nanin u Menùn, a Bernà de Mourian e a tutti i massacai che hanno "costruito" la vera Liguria, quella di pietra, quella che noi stiamo abbandonando.

A vigna du barba Federì ine Brughé

Che pecau vive in t’in tempu

che nu se fà ciǘ de maixéi!

S’i se ghe méte, au giurnu d’ancöi,

i fan spediu cun prie e simen…

Ma mi m’avisu de candu i mürava

cun tüta l’arte che vö stu travagliu,

i l’acumensava scavendu ina söglia

cu u picu, u paferu, ina sapa e in magagliu.

Au cussutan e prie ciǘ marìe,

pöi i l’atacava cun u primu ran,

i seghìa a fira cun e prie ciù bele

deré de scaglie e de massacan.

Segundu ai posti e prie i scangiava,

gh’eira u sagiùn, u curumbìn, u sgrùtu,

cun u testǘ au megliu i e scadrava

e deré in bocia u purgìa de tütu.

Pe fa in maixé gh’andava u so tempu,

ma l’eira in passu assai naturale,

numa che ancöi che andamu de cursa

ciǘ a nu paresce ina cousa nurmale.

E se ciarlava tranchili tra e prie

süendu forte sute au sù de l’estae,

e i mei regordi i se porta de couse

che nu e on mai ciǘ atrövae.

Da chela funtana in po’ d’aiga fresca

cun in brocu i figliöi i l’andava a piglià,

de voute cun in fiascu che au postu du tapu

u l’ava ina föglia de viu recegà.

Du pan e pumata se ghe n’è mangiau

in se chela scareta acumensà,

poi suta a in figu, cun in lensurun,

au frescu s’andava a repousà.

Candu servia e s-cianassöre

vö dì che eirimu au ran survan:

chelu maixé u l’eira tostu feniu

e de voute l’ura du levaman.

Pöi besögnava arangiaghe a tera

e acianelà a fascia davanti,

ince cu e scaglie i sgarbi ciù grossi

e arecampà i feri e i avansi.

Parescìa da nu crede, ma in te poche giurnae

chelu maixé u l’eira stau fau

e a ben pensaghe pe çincant’agni

u ghe serìa magara arestau.

U maixé cun a puntà u l’è in opera d’arte

che nu me stancu  mai de gardà

e me despiaixe pensà che in giurnu

o prima o dopu u s’agarerà.

Pia Viale - dialetto di Vallebona

IL MURO A SECCO

Che peccato vivere in un’epoca

in cui non si fanno più i muri a secco!

Se ci si mettono oggigiorno

fanno presto con pietre e cemento…

Ma io mi ricordo di quando muravano

con tutta l'arte che vuole questo lavoro,

cominciavano scavando la base

con il piccone, il palanchino, una zappa ed un bidente.

Al fondo mettevano le pietre più brutte,

poi iniziavano il primo strato,

seguivano la linea retta con le pietre più belle

e dietro pietre piccole e medie.

Secondo ai luoghi le pietre cambiavano,

c’era il sabbione, la colombina, l’ardesia tenera,

con la piccola mazza al meglio le squadravano

e dietro un apprendista porgeva di tutto.

Per fare un muro a secco occorreva il suo tempo

ma era un ritmo assai naturale,

solo che oggi che viviamo nella fretta

più non ci sembra una cosa normale.

E si chiacchierava tranquilli tra le pietre,

sudando forte sotto il sole dell’estate,

e i miei ricordi conservano cose

che non ho mai più ritrovate.

Da quella fontana un po’ d’acqua fresca

con un'anfora i bambini andavano a prendere,

a volte con un fiasco che al posto del tappo

aveva una foglia di vite pieghettata.

Del pane e pomodoro se ne è mangiato

su quella scaletta incominciata,

poi sotto ad un fico, con un telo di juta,

al fresco si andava a riposare.

Quando servivano le pietre piatte

significava che eravamo all’ultimo strato:

quel muro a secco era pressoché finito

e a volte l’ora del fine-giornata.

Poi bisognava aggiustare la terra

e ripianare la terrazza antistante

riempire con le pietre piccole i buchi più grossi

e raccattare gli attrezzi e gli avanzi di pietre.

Sembrava incredibile, ma in pochi giorni

quel muro a secco era stato fatto

e a ben pensarci per cinquant’anni

ci sarebbe magari rimasto.

Il muro a secco puntato è un’opera d’arte

che non mi stanco mai di guardare

e mi dispiace pensare che un giorno

o prima o dopo cadrà.