L’OMU DU MAGAJU di Angioletta Ascheri Grosso

L'Associazione culturale A Cria di Vallebona,
profondamente dispiaciuta, saluta la cara e simpatica amica Angioletta 

che, per tanti anni, ha reso allegre e spiritose le serate 

de U Giacuré in piazza.

Angioletta Ascheri Grosso

Ina chinzena d’agni fa, candu l’invernu u ne staixeva pe’ lascià,

e l’amandura a incumensaiva a brutezà,

u arrivava pe-e campagne du Surà,

in brav’omu, ch’u ghe piaxeiva tantu magajà…

U nu eira pe’ ren tracagnotu, ansci,

a so péle a eira propiu atacà a l’ossu!

E sue fatesse in u eira pe’ rèn bèle,

e chele povere braghe i ghe rezeva e bertéle.

E so brasse, seche cume stucafisci, e u so fa

u te dixeva ch’u nu aveva mai avüu de visci.

A so bursa, ina pecina mandià e drente

u gh’aveva u so sdernà…

Cun ina bèla scapelata in segnu de rispètu u dumandaiva:

“Signò ci avite qualcosa da fa, ‘na fascetta da magajà?”

U incumensaiva a travajà cun gàribu e bona vuluntà e, a son de magajàe,

u te preparaiva l’ortu pe’ semenà e bone verdüre pe’ a növa anà…

Cande u su staixeva pe’ carà

u nu gh’eira mancu ciü in gevu da sciacà!

St’omu u se des-ciulava pe’ acuntentà u bacàn,

u eira urgugliuusu de gagnasseru bèn stu tocu de pan.

A butija de vin ch’u se scuraiva, man man ch’u magajaiva

a ghe daixeva a forsa de finì a giurnà.

Ma avura duv’u l’è finiu l’omu du magaju?

Chel’umetu sécu, sutiru u s’è persu, u s’è arrichiu,

o u averà reesu a so agnima a Diu?

U nu sareva giüstu ch’u nu avesse lasciàu

a nisciün a so eredità: a voja de travajà,

l’amù pe’ a tèrra e a pasciun de magajà!

Angioletta Ascheri Grosso – dialetto di Sanremo