Bignone
A vegu a sima gianca de Bignun
e a me figüru u boscu sute a neve.
Cume i seran, in te sti giurni, e ciante
cu’ e rame negre e nüe, in tu silensiu?
U me ven in mente i giurni de novembre,
a l’aria fina, u freidu ch’u punzeva…
Me maire a me purtava pe’ catsagne.
E ciante i s’eira tüte despujae,
cu’ e foje seche a a caussa, aute e sciöe.
E mi lì drente a remes-ciaivu atenta
in serca de castagne bele grosse,
lüstre inta rissa e sane, cume növe.
Pe’ ognüna ch’a atruvaivu ina surpreisa:
alegre, i sciurtiva da a me buca
parole runde e ciare, cume bote
sparae da in s-ciopu, forti, sensa intupi.
Me maire a me diixeva: “Fa cianin!”
Nu fa burdelu in te stu boscu taixu,
ti nu u senti che silensiu grande?
U gh’è tante bestiète, chi aciatae,
i fan passà l’invernu e i dorme in paixe.
Nu e descià da u sonu, fa cianin!”
Ascì e ciante du boscu u me diixeva:
“Stà sita!” cun u diu davanti a a buca…
Cande Bignun u s’ingianca, cume ancöi,
a vegu ancù chela petita asbìa,
nasu e pumeli rusci, cume mere,
ch’a viveva cuntenta e a nu u saixeiva.
Gabriella Gismondi – dialetto di Sanremo
FA PIANO!
Vedo la cima bianca di Bignone
e immagino il bosco sotto la neve.
Come saranno, in questi giorni, le piante
con i rami neri e nudi, nel silenzio?
Mi ricordo i giorni di novembre,
l’aria fina, il freddo che pungeva…
Mia madre mi portava per castagne.
Le piante erano tutte spogliate,
con le foglie secche al piede, alte e soffici.
E io rovistavo lì dentro attenta
in cerca di castagne belle grosse,
lucide nel riccio e sane, come nuove.
Per ognuna che trovavo, una sorpresa:
allegre, uscivano dalla mia bocca
parole tonde e chiare, come colpi
sparati da un fucile, forti, senza ostacoli.
Mia madre mi diceva: “Fa piano!”
Non fare rumore in questo bosco silenzioso,
non senti che silenzio grande?
Ci sono tanti animaletti, qui, nascosti,
trascorrono l’inverno, dormono placisi.
Non li svegliare dal sonno, fa piano!”
Anche le piante del bosco mi dicevano:
“Sta’ zitta!”, con il dito davanti alla bocca…
Quando Bignone s’imbianca, come oggi,
rivedo quella bambina vivace,
naso e guance rossi, come mele,
che viveva contenta e non lo sapeva.
Nessun commento:
Posta un commento