IN OMU AFURTÜNAU di Costanza Modena

U gh’è vusciüu pascensa pe’ sti veij,

passà i agni beli cu’ i magaij,

acianelà tera e frabicà maixei,

fa bele fasce de sti sgaratei.

Me barba u se stimaiva afurtünau,

trei mas-ci sa mujè a gh’aixeva dau;

me paire, noma due garsunete,

ch’i l’eira cume fragili sciurete.

U barba: “Cu’ a forsa ch’a l’ho in cà

int’in giurnu a reversu ina valà.

Garda lagiü me frai, da stamatin,

pica e pica, u n’ha faitu in tuchetin”.

Pe’ cujunaru u u ciamava belinun,

percouse in mas-ciu u nu l’aixeva fau,

ma gardandu a a fin de sta chistiun,

me paire u l’è stau certu afurtünau.

Cande e sue forse i l’han abandunau,

u barba u nu l’è stau ciü afurtünau:

tere cene de erbasse e de ruvei,

i fijöi i se sun dai a autri mestei.

E fije i nu han dau corpi de magaju,

ma cande u paire u l’è vegnüu veju,

tante cüre e atensiun i gh’an mustrau!

Tre nöire… che discursu ch’a l’ho fau…!

Costanza Modena – Diletto di Sanremo

UN UOMO FORTUNATO

I nostri vecchi hanno avuto pazienza,

passare gili anni migliori col magaglio,

spianare terreni, tirar su muri,

trasformare i gerbidi in belle fasce.

Mio zio si reputava fortunato,

sua moglie gli aveva partorito tre maschi;

mio padre, solo due bambine,

che erano fragili come fiorellini.

Lo zio : “Con la forza che ho in casa,

in un giorno giro sottosopra una vallata.

Guarda laggiù, mio fratello: da stamattina,

picchia e picchia e n’ha fatto un pezzetto!”

Per prenderlo in giro lo chiamava stupido,

perché non aveva saputo fare un maschio,

ma considerando l’esito di questo discorso,

mio padre è stato certo fortunato.

Quando le forze lo hanno abbandonato,

lo zio non è stato tanti più fortunato:

i terreni pieni di erbacce e di rovi,

i figli hanno preferito fare altri lavori.

Le figlie non hanno zappato la terra,

ma quando il padre è diventato vecchio,

quante cure e attenzioni gli hanno mostrato!

Mentre tre nuore… che discorso che ho fatto…!