U NONU FRANSÈ di Costanza Modena

S’a pensu au nonu, a me u vegu vegnì avanti,

pe’ a stradeta sute u casun, cu’ in sacu de avenassu

pe’ i cunii e in cavagnétu cuvertu de föje.

U l’eira autu cume in garsunetu de deixe agni,

i caveji grixi de longu despentenai;

cu’ a man u s’agiütava a gardà, cun chelu po’

de lüxe che u ghe restava in ti öji.

Riendu u me dixeva: «Ti vegni a fregame e fighe,

pelandruna: che a nu te veghe a nona, che a s’aragia!»

Mi a aissavu ina föja du cavagnetu e a dixevu:

«E ste mescìe pe’ chi i sun?» Pe’ nu rispunde

elu u lansava lì avenassu e cavagnetu e

s’arampinava, cume in schirö, sciü in’uriva che

u ghe faixeva fatiga a abrassàne u truncu,

tantu u l’eira grossu l’erburu e pecin elu.

«Couse ti munti, u nu ghe n’e fighe, l’urivu u nu ne fa!»

A u sentivu rie cume in fijö pe’ a sua bravata

e lasciü in sima u me paixeva ancura ciǜ pecin.

Vegnendu veju, u s’eira messu in ta testa

che cande u scampava d’aiga, u so nemigu Pipin u gardava;

cu’ u tempu, sta fissasiun a l’eira diventà ciǜ forte

e alura au sentiimu crià fina a negra nöte.

Me paire u ghe mugugnava de longu: «U nu gh’è nisciün

ch’u te garde stu ciùn che ti hai lì!»

U vuixeva aruvà a sent’agni e fina au duamila, ma

u s’è afermau a nuvantasei, cande u nu cunusceva ciǜ nisciün.

Stu chi, tra i tanti, u l’è l’aregordu che a l’ho

de me nonu Fransè diitu u Pilatu, veju sanremascu.

Costanza Modena - Dialetto di Sanremo

IL NONNO FRANCESCO

Se penso al nonno, me lo vedo venire avanti,
per la stradina sotto il casolare, con un sacco di avena
per i conigli e un cestino coperto di foglie.
Era alto come un bambino di dieci anni,
i capelli grigi sempre spettinati:
con la mano si aiutava a guardare, con quel po' di luce
che gli rimaneva negli occhi. 
Ridendo mi diceva: «Vieni a rubarmi i fichi
pelandrona: che non ti veda la nonna, che si arrabbia!»
Io alzavo una foglia dal cestino e dicevo:
«E questi fichi fioroni per chi sono?» Per non rispondere
lui lanciava lì l'avena e il cestino
e si arrampicava, come uno scoiattolo, su di un ulivo a cui
faceva fatica ad abbracciarne il tronco,
tanto era grosso l'albero e piccolo lui.
«Cosa sali, non ce ne sono fichi, l'ulivo non ne fa!»
Lo sentivo ridere come un bambino per la sua bravata
e lassù in cima mi sembrava ancora più piccolo.
Venendo vecchio si era messo in testa
che mentre faceva la pipì, il suo nemico Pipin lo guardasse;
col tempo, questa fissazione era diventata più forte
e allora lo sentivami gridare fino alla nera notte.
Mio padre gli mugugnava sempre: «Non c'è nessuno
che ti guardi questo ciun che hai lì!»
Voleva arrivare fino a cent'anni e fino al duemila, ma
si è fermato a novantasei, quando non conosceva più nessuno.
Questo, tra i tanti, è il ricordo che ho
di mio nonno Franscesco, detto Pilato, vecchio sanremasco.