SEIRANA DA LUVI di Costanza Modena

Sprufundà in ta mè putruna preferìa,

a gata in sci zenui, apenachìa,

a sentu u ventu ch’u spuncia a porta

u pica ai vedri, cume u vuresse intrà.

U sciuscia, u striscia in sce ciante, cume in’undà

de maregassa ch’a sbate contru a cà…

Ma nu l’è ciǘ a tramontana d’ina vota,

cande a a nöte i bufurui

i faixeva tremurà porte e barcui:

lansanduse giǘ pe’ Colabela,

i se infirava int’a gura di fussai

cun ina vuixe forte, ascaixi in lairu,

cume de luvi da e tane despurniai.

A se strenzeimu inturnu a a stüfa asseiza,,

che in po’ a fümava e a faixeva lagrimà;

u nonu veji ciǘ arente au fögu

u s’assetava, a fasse arescaudà.

U paire u ne diixeiva: “Stai tranchili,

e vedrine i sun ferme, dani u nu ne fa.

Nui semu au caudu e a l’asustu,

a l’amu messu a postu l’öriu e u vin,

a farina e a pulenta i sun a camin…”

A vuixe bassa, bugiendu apena a buca,

a maire a ne diixeva: “Sciǘ, pregamu,

che u Segnù u l’agiüte chi nu à cà,

ch’u l’à fame e nisciun ghe ne dà”.

Cu’ e prime parole de l’Avemaria

u sonu u ne cuiva, u ne purtava via.

Costanza Modena - dialetto di Sanremo

SERATA DA LUPI

Sprofondata nella mia poltrona preferita,

la gatta sulle ginocchia, appisolata,

sento il vento che spinge alla porta,

picchia i vetri, come se volesse entrare.

Soffia, striscia sulle piante, come un’ondata

di violenta mareggiata che sbatte contro la casa.

Ma non è più la tamontana di una volta,

quando la notte le folate

facevano tremare porte e finestre:

buttandosi giù da Collabella,

s’infilava nella gola dei fossati

con una voce forte, quasi un lamento,

come dei lupi espugnati dalle tane.

Ci stringevamo intorno alla stufa accesa,

che faceva un po’ di fumo e faceva lacrimare;

il nonno vecchio più vicino al fuoco

si sedeva, per riscaldarsi.

Il padre diceva: “State tranquilli,

le serre sono ferme, danni non ne fa.

Noi siamo al caldo e al riparo,

abbiamo messo a posto l’olio e il vino,

la farina e la polenta sono in preparazione…”

A voce bassa, muovendo appena la bocca,

la madre ci diceva: “Su, preghiamo,

che il Signore aiuti chi non ha casa,

chi ha fame e nessuno gliene dà”.

Con le prime parole dell’Avemaria

Il sonno ci coglieva, e ci portava via.