FANTARSMA di Roberto Rovelli

L’ařén d’in fantarsma

u me càmuřa u çérvélu,

cu’in audù de fürminànti,

agru cume u sùrfanu brüxàu

int’i prefundi de l’Infernu.

Desgravàu d’â témansa,

in pensaméntu pruibìu

u desténde i sòi véři de catràn

sciü i mei ögli imbarlügài

da chela lüxe ch’a s’atröva

propiu pe’ adescià a cusciénsa.

Ma nu’ se pö ascunde a curpa

ch’a cuřa tachignusa int’i ossi,

inviscandu e trapele d’u remòrsciu.

Alù, tremöřandu, çercu àiga de pila,

pe’ lavà a màcia d’u pecàu

ch’u brüxa int’ê véne seche

d’u mei cö urmai muribùndu.

Ma e preghèire i nu’ pön sciügà

e làgrime versàe, pe’ pentiméntu,

sciü l’autà d’in’àrima perdüa.

Ina longa sciumbria negra,

alévanduse cu’u füme d’ê candéře,

a svöřata cum’ina ratapena

ch’a stégne, cu’e sòu aře,

a spéransa da mei remisciùn.

Cuscì, ‘su fantarsma u me cundana

a girundà, cum’u méschìn Ulisse,

çércàndu, desperàu, a mei Itaca,

fra lampi, bufurùi e maregasse.

Roberto Rovelli – Dialetto de La Mortola

Poesia presentata al “Gino Guglielmi” 2013 (Famija Sanremasca)

FANTASMA

L’alito di un fantasma

mi tarla il cervello,

con un odore di zolfanelli,

acre come lo zolfo bruciato

negli abissi dell’Inferno.

Partorito dal timore,

un pensiero proibito

stende i suoi veli di catrame

sopra i miei occhi abbagliati

da quella luce che esiste

proprio per svegliare la coscienza.

Ma non si può nascondere la colpa

che cola appiccicosa nelle ossa,

invischiando i panioni del rimorso.

Allora, tremando, cerco acquasanta,

per lavare la macchia del peccato

che brucia nelle vene secche

del mio cuore ormai moribondo.

Ma le preghiere non possono asciugare

le lacrime versate, per pentimento,

sopra l’altare di un’anima perduta.

Una lunga ombra nera,

alzandosi col fumo delle candele,

svolazza come un pipistrello

che soffoca, con le sue ali,

la speranza della mia assoluzione.

Così, quel fantasma mi condanna

a vagare, come il poveretto Ulisse,

cercando, disperato, la mia Itaca,

fra lampi, raffiche di vento e mareggiate.