LAMENTO PE-A ÇIVETTA di Plinio Guidoni

Çivetta, seu predestinâ,

che fin t'æ fæto dòppo quella seia

che t'ò sentïo cantâ sciù pe San Ròcco?

Tutti te créddan segno de desgraçia,

ma l'é perché no san

a poïa ch'a t'accompagna

da-o giorno da creaçion, quello tremmâ

de äe arrensenïe

e a luxe gianca di tò euggi riondi.

Eppure giàppan

che l'é stæto pe ti se à San Fruttoso

an ammassòu 'na dònna in mëzo a-e ròcche

e se a gragneua a s'é sfogâ inte l'òrto.

Ti î senti dî

che ti saiësci a voxe de'n destin

ch'o pòrte sangue, mòrte e distruçion,

ma in concluxon no çèrcan de accapî,

quello che veuan l'é levâte da mëzo

e intanto làscian che l'òmmo do cappusso

o continue o governo do timon.

Ma ti, che fin t'æ fæto, mæ çivetta,

seu desgraçiâ?

Aviæ vosciùo criâ

e dîte: Scappa, ch'ò visto derrê à un ærboo

o contadin co-o scceuppo ch'o te çerca!

Ma a voxe a m'é mancâ.

Da quello giorno

ògni tanto te veddo xuâ

feliçe 'n çê tra sciammi de passoëte,

ciù vexinn-a de noätri a-o gran mistero.

Plinio Guidoni – Dialetto di Genova

LAMENTO PER LA CIVETTA

Civetta, sorella predestinata,

che fine hai fatto dopo quella sera

quando ti udii cantare verso San Rocco?

Tutti ti credono segno di disgrazia,

ma è perché non sanno

la paura che ti accompagna

dal giorno della creazione, quel tremare

dell'ali rattrappite

e la luce bianca dei tuoi occhi tondi.

Eppure cianciano

che è colpa tua se a San Fruttuoso

hanno ucciso una donna tra le rocce

e se la grandine si è sfogata nell'orto.

Li senti dire

che saresti la voce d'un destino

che porta sangue, morte e distruzione,

ma in conclusione non cercano di capire,

ciò che vogliono è toglierti di mezzo

e intanto lasciano che l'uomo dal cappuccio

continui il governo del timone.

Ma tu, che fine hai fatto, mia civetta,

sorella disgraziata?

Avrei voluto gridare

e dirti: Scappa, ché ho visto dietro a un albero

il contadino col fucile che ti cerca!

Ma mi mancò la voce.

Da quel giorno

ogni tanto ti vedo volare

felice in cielo tra sciami di passeri,

più vicina di noi al grande mistero.