La Mortola (Ventimiglia)
Infin, l’areuplanu u l’è aterràu a Nissa.
Dapöi d’avé passàu longhe ure vöřandu,
fra fantaixiùsi castéli de nìvuře gianche,
u l’è in pieixé tirà in sciau de cunfòrtu
e purré turna pousà i pei insci’â terra fèrma.
A còsta ciü bèla d’u mundu a m’invita,
int’in abràssu de lüxe, prufümi e cuřùi,
cünàndume, â cadénsa duçe de l’unda,
cu’ina müxica recamà da in audù de sarìn.
Chi, sciü ‘sti scögli fragelài, ghe son créscüu;
fra ‘ste rame de pin, on çercàu d’esse in omu
e in dì, ‘ste prie antighe i m’an vistu scapà.
Ma ancöi son returnàu; son turna a ca’.
Cuscì, arrivàu int’u giru d’a Cruxe,
cu’in stissìn de baticö, me fèrmu a mirà.
E là, fra i àrburi, int’ina fara de lüxe,
cume s’u m’aspeitesse pe’ salüàme,
u mei paìse u parésce, cum’int’ina vixùn:
e càe gianche e rösa, amügliàe insci’â cola,
a Turre de Basigliu, a rédòussu d’in èrxu,
a géixa cu’u campanìn, ch’u gatìglia u celu
e lagiü, i Giardìn* ch’i cařa fin â marina.
Penelàe de cuřù, int’u cadru d’a vita
pintàu, cun amù, dau ciü grandu Pitù.
Tütasséme, in fervù de regòrdi u m’alaga u cö,
cu’ina rivàira d’emuçiùn e mařincunia,
che nu’ pösciu ciü tratégne
e làgrime
e me métu a ciagne, cume se fusse in figliö.
Roberto Rovelli – Dialetto de La Mortola (Ventimiglia)
IL MIO PAESE
Finalmente, l’aeroplano è atterrato a Nizza.
Dopo aver passato lunghe ore volando,
fra fantasiosi castelli di nuvole bianche,
è un piacere tirare un sospiro di sollievo
e poter nuovamente posare i piedi sulla terra ferma.
La costa più bella del mondo m’invita,
in un abbraccio di luci, profumi e colori,
cullandomi, al ritmo dolce dell’onda ,
con una musica ricamata da un odore di salsedine.
Qui, sopra questi scogli flagellati, ci sono cresciuto;
fra questi rami di pino, ho cercato d’essere un uomo
e un giorno, queste pietre antiche mi hanno visto
scappare.
Ma oggi sono ritornato; sono nuovamente a casa.
Così, arrivato nella curva della Croce,
con un pochino di trepidazione, mi fermo a guardare.
E là, fra gli alberi, in un bagliore di luce,
come se m’aspettasse per salutarmi,
il mio paese appare, come in una visione:
le case bianche e rosa, ammucchiate sul colle,
la Torre di Basiglio, a ridosso di un leccio,
la chiesa col campanile, che solletica il celo
e laggiù, i Giardini* che scendono fino al mare.
Pennellate di colore, nel quadro della vita
pitturato, con amore, dal più grande Pittore.
All’improvviso, una ridda di ricordi m’allaga il cuore,
con un torrente d’emozione e malinconia,
che non posso più trattenere le lacrime
e mi metto a piangere, come se fossi un ragazzino.
*Giardini Hanbury.
(U Berriùn - Nº 4 - 2012)
