FIGGIEU DO TERSO MONDO di Renzo Ferrero

Quelli  cranï  macrocefali

coverti  de  riççi  neigri

comme  'na  pellissa  d' astrakan

ch' àn  i  figgieu  piccin  do  terso  mondo...

Quelli  euggi,  neigri,  tristi  e  lacrimosi,

profondi  comme  o  fondo  de 'n  vulcan

che  mandan  lampi  de  feugo 

comme  lava  fûsa

ma  contornæ  da  sciammi  de mosche

che  sûssan  l' ûmore  da congiuntivite...

Quelli  nasi  cö  mocco ch'o colla

in  scë  lerfe  carnose...

Quelle costiggieue che spuntan dä pelle

formando tra ûnn-a e l'ätra sorchi de famme...

Quella  pelle  teisa 

de  panse  che  pàn   balloìn,

braççe  che  pàn  grissin

appeise  a  'n  tronco  coverto  de  strasse

ch' o  s'arreze in scë due gambe de séllao...

Questi son i figgieu ch'han famme...

Coscì  no  ti  te  rendi  conto

de  comme  fassan  a  tïâ  feua

due  righe  de  denti  gianchi,

mettîse a  rïe,  dâse  di  sponcioin

pe intrâ  tûtti  quanti

in te l'obbiettivo de 'na telecamera a colori

comme i figgieu de  tûtto o mondo !

Renzo Ferrero – Dialetto di Genova

BAMBINI  DEL  TERZO  MONDO 

Quei  crani  macrocefali 

coperti  di  riccioli  neri 

come  una  pelliccia  di  astrakan 

che  hanno  i  bambini  del  terzo  mondo.... 

Quegli  occhi  neri,  tristi  e  lacrimosi, 

profondi  come  il  fondo  di  un  vulcano

 che  mandano  lampi  fuoco 

come  lava  fusa

 ma  contornati  da  sciami  di  mosche

che  succhiano  l' umore  della  congiuntivite...

Quei  nasi  col  moccio  che  cola 

sulle  labbra  carnose...

Quelle  costole  che  spuntano  dalla  pelle 

formando  tra  una  e  l' altra  solchi  di  fame...

Quella  pelle  tesa 

di  pance  che  sembrano  palloni, 

braccia  come  grissini 

appese  a  un  tronco  coperto  di  stracci 

che  si  regge  su  due  gambe  di  sedano...

Questi  sono  i  bambini  che  hanno  fame...

Così  non  ti  rendi  conto 

di  come  facciano  a  mostrare 

due  righe  di  denti  bianchi, 

mettersi  a  ridere  e  darsi  spintoni 

per  entrare  tutti  quanti 

nell' obbiettivo  di  una  telecamera a colori  

come  i  bambini  di  tutto  il  mondo.

LURÉ DE PESSE IN FRANSA di Vincenzo Jacono

Avanti che a culonia chì a svernesse

A gòude u su, cume e rascasse, eh scì,

Pe’ i nostri veji a eira magra, ahimì,

Daa Pigna u besœgnava ch’i sarpesse.

In Fransa desbarcau Luré de pesse,

Girendu i œji s’è vistu aparì

In tabelun cun sciü: “Chemiserie”

A carateri verdi. U fatu d’esse

A zazun de franseese, in italian

U ha lezüu: “Che miserie!” – “Porcu can

- U ha butau – Fina chì?! A st’avertensa

Ancù bèn ch’ò abadau… Eh mi, pascensa!

Miseria pe’ miseria, tant’u va

Ch’a me turne a tegnì chela nustrà” –

Vincenzo Jacono – Dialetto di Sanremo

LORENZO DALLE TOPPE IN FRANCIA

Prima che la colonia qui svernasse

A goder il sole, come i gechi, eh sì,

Per i nostri vecchi erano tempi magri, ahimè,

Dalla Pigna bisognava che emigrassero.

In Francia è sbarcato Lorenzo delle toppe,

Girando gli occhi si è visto apparire

Un tabellone con su scritto: “Chemiserie”

A caratteri verdi. Il fatto di essere

Digiuno di francese, in italiano

Ha letto: “Che miserie!” – “Porco cane

- Ha sbottato – pure qui? A quest’avvertimento

Ancor bene che ho fatto caso… Ohi me, pazienza!

Miseria per miseria, tanto vale

Che mi tenga nuovamente quella nostrana” –

L’AUXINÈLU di Mario Saredi

In ràppu d’üa

l’èira u prèmiu.

Gh’èira d’arivà

avànti d’i àutri,

sènsa sautà.

Cànti èirimu,

nu  m’aregòrdu  ciü,

ma in paregli.

Çému partìi,

a cùrsa a nu l’èira lònga,

gh’èira da arivà fia là.

Hon fàu de tüttu

pe’ èsse u primu,

ma nu ghe l’hon fa,

u premiu chi m’han dàu,

u nu l’è stàu gaire bèlu,

me sun duvüu acuntentà,

d’in auxinèlu.

Mario Saredi – Dialetto di Camporosso

L’ACINO

Un grappolo d’uva

era il premio,

c’era  da  arrivare

prima degli altri,

senza saltare.

Quanti eravamo,

non mi  ricordo più

ma in molti.

Siamo partiti,.

la corsa non era lunga,

bisognava arrivare fino la,

Ho fatto di tutto

per giungere  primo 

ma non ce l’ho fatta.

Il premio che mi hanno dato,

non è stato molto  bello,

mi sono dovuto accontentare

di un’acino..

U CASUN di Gin De Mori

Ina cà int'u mezu a l'urivéu

faita ancù de rüstegu priame

cun l'urnamentu d'in custu de ruveu

ch'u paixeva ciantau lì cume sciurame.

L'eira u “casun”, u casun di nostri veji

fabricau a son de stenti e privassiun

e forsci a cunsina ch'a-u tegniiva in pei

a l'eira impastà de süù e de pasciun.

In fugurà int'in cantu da cuxina,

u pairò a buje au fögu du trempé,

u bujuretu pé l'àiga, u touru e a farina

pé impastà pan e figassa a ciü puré.

E pöi chela stansia de surve, pécenina

duve u gh'eira u letu e u ghirindun

pé puresse acuregà sensa fa muìna

sc'ina strapunta de föie de granun!

Tempi de vita alura assai meschina

de gente travajaduusa e sempre unesta

cun in cö grossu cume ina marina

e duve a marissia a l'eira ancù furesta!

Gin De Mori – Dialetto di Sanremo

IL CASOLARE

Una casa in mezzo all'uliveto

fatta con rustico pietrame

con l'ornamento di un cespo di rovo

che sembrava piantato lì come fiorame.

Era un “casun”, il casolare dei nostri vecchi

fabbricato a froza di stenti e privazioni

e forse la calce che lo teneva in piedi

era impastata di sudore e di passione.

Un focolare nell'angolo della cucina,

un paiolo a bollire al fuoco del trepiedi,

un bollitore per l'acqua, la tavola e la farina

per impastare pane a focaccia a più non posso.

E poi quella stanza di sopra, piccolina

dove c'era il letto e il comodino

per potersi coricare senza moine

su di una strapunta di foglie di granoturco!

Tempi di vita allora assai povera

di gente laboriosa e sempre onesta

con il cuore grosso come il mare

e dove la malizia era ancora straniera!

ORMAI di Luigi Cornetto

E se lascemmo andâ

sensa sillâ

inte sto mondo

ciatto

o foscia riondo,

pe fâse rebellâ

da 'n sciumme

e chissà donde

o ne portiâ.

Tutto

l'è deciso ormai

e a niätri

pövei Barudda*

no ne resta che aspetâ.

Luigi Cornetto – Dialetto di Genova

ORMAI

E ci lasciamo andare

senza fiatare

in questo mondo

piatto

o forse rotondo,

per farci strascicare

da un fiume

e chissà dove

ci porterà.

Tutto

è deciso ormai

e a noi

poveri Barudda*

non ci resta che aspettare.

*Barudda: antica maschera genovese.

ÛN COMME MÌ di Renzo Ferrero

Ûn  comme  mì  ch' o  vive  in  çittæ,

in  te  'na  casa  sò, 

con  a  comoditæ  de lûxe, gas, ægua corrente

o  no  se  rende  conto

de  comm' a  fasse  a  vive  tanta  umanitæ

sempre  in  cammin,

sbattûa  de  sa  e  de  là  pe-o  mondo

comme  pedinn-e  ignare  e  rassegnæ

de  'na  tragica  partìa  de  teja-moìn.

Congo,  Ruanda,  Cecenia,  Iran,

pe  fâ  i  nommi  ch' emmo sempre sottoman...

Ûn  comme  mì

che  ghe  dà  fastidio  a  spûssa  do deporatô

o  no  se  rende  conto  de  comme  possan  vive

in  mëzo  a-o  merdasso  e  sotto  o  sô

contornæ  da  sciammi  de  moscoin  merdæ.

Ûn  comme  mì

ch' o  s' incassa  pe  'n  guasto  a  l' ascensore

cös' o  dovieiva  dî  de  quella  gente

ch' a  vive  in  te  'na  tenda  'n  sciö  terrén

o  in  te  baracche  de  laméa  ondulâ,

de  plastica,  de  færo  o  d' eternicche...

Ûn  comme  mì  ch' o  ven  nervoso

se  o  treno  o  tarda  trei  menûti 

e  poi  o  vedde  ommi  càreghi  de  strassoin

sponciâ  de  biciclette  sconcasciæ

dove  gh' han  fæto  stâ  de  tûtto  'n  pò :

strapunte,  coverte,  cassòule  e  cassoulin...

e  o  vedde  quelli  euggi  sensa  sorriso

spuntâ dai gruppi appeisi a-e schenn-e de moæ

che  camallan  stagnoìn  d' ægua

pe  fâ  da  mangiâ  e  pe  levâse a  sæ

(e  che  mì  no  daiéiva  manco  a-i  fiori) !

Ûn  comme  mì  allôa  o  se  domanda :

ma  quant' a  và  'na  bomba,  'n  missile,  'n  cannon...?

Poi  o  tïa  a  indovinâ

ma  a  risposta,  anche  se  giûsta 

a  saiä  sempre  sbagliâ...

Renzo Ferrero – Dialetto di Genova

UNO  COME  ME  

Uno  come  me  che  vive  in  città,

in  una  casa  sua,

con  la  comodità  di  luce,  gas,  acqua  corrente,  

non  si  rende  conto 

di  come  faccia  a  vivere  tanta  umanità 

sempre  in  cammino, 

sbattuta  qua  e  là  per  il  mondo 

come  pedine  ignare  e rassegnate 

di  una  tragica  partita  di  tela  mulino.

Congo,  Ruanda,  Cecenia,  Afganistan 

per fare i nomi che abbiamo sempre sottomano. 

Uno  come  me 

che  non  sopporta la  puzza  del  depuratore 

non  si  rende  conto  di  come  

possano  vivere  in  mezzo  al  liquame  e  sotto  il  sole  

contornati  da  nuvole  di  mosche  merdaiole. 

Uno  come  me 

che  s' incazza  per  un  guasto  all' ascensore  

cosa  dovrebbe  dire  di  quella  gente 

che  vive  in  una  tenda  sul  terreno 

o  in  baracche  di  lamiera  ondulata 

di  plastica,  di  ferro  o  d' eternit ? 

Uno  come  me  che  diventa  nervoso 

se  il  treno  tarda  tre  minuti 

e  poi  vede  uomini  carichi  di  stracci 

spingere  biciclette  sconquassate 

dove  hanno  fatto  stare  di  tutto  un  po':  

materassi,  coperte,  casseruole  e  pentolini… 

e  vede  quegli  occhi  senza  sorriso 

spuntare  da  fagotti  appesi  alle  schiene  delle  madri 

mentre  portano  taniche  d' acqua 

per  fare  da  mangiare  e  per  togliersi  la  sete 

(e  che  io  non  darei  neanche  ai  fiori!)

Uno  come  me  allora  si  domanda: 

ma  quanto  costa  una  bomba,  un  missile,  un  cannone ? 

Poi  tira  a  indovinare, 

ma  la  risposta  anche  se  giusta,

sarà  sempre  sbagliata… 

MÀIRE di Vincenzo Bolia

Màire, che beléssa s’a purésse

ancù sentì e toe parole,

i töi mugugni.

Màire, che sciàla s’a purésse

ancù vié chéla to béla facia

e u to surìisu.

Màire, mi a te rivégu tüti i giurni

int’i öji de mé fìu,

ma tü ti nu ghe sei ciü.

Vincenzo Bolia - Dialetto di Sanremo

Poesia che ha partecipato a "U Giacuré 2019" - XXXII Edizione

MAMMA

Mamma, che gioia potessi

ancor sentire le tue parole,

i tuoi mugugni.

Mamma, che felicità se potessi

ancor vedere il tuo volto,

il tuo sorriso.

Mamma, io ti rivedo ogni giorno

negli occhi di mio figlio,

ma tu non ci sei più.