ASSAGIAUI di Ovidio Bosio

Due assagiaui çerchendu du bon vin

i munta a Dussaiga pe u Vermentin

e datu che i sun lì i tasta u Russese

e i ven se lʼè veʼ du ben chi i ne dixe.

I ghe offre chelu du Mandino

che intʼina giaixa u lʼavia a so cantina.

Escì chelu de Testalonga i ghe fan assagià

che forse u lʼè ciü bon, a eli u pà.

U giru pòi u cuntügna intʼin autru fundu

vistu che intʼi carrugi ghe nʼè in sprufunfu.

A ciache tapa i ne bève in gotu

çerchendu e calità de ciascün tipu.

U primu assagiaù u garda u curù

e u-u nasüssa pe sentì lʼaudù:

u sa de recanissu e rosa canina

messciau au refrescüme de cantina

cun tutu che u retrugüstu duminante

lʼè chelu du coiru, següramente.

U segundu u-u garda in trasparença

e u-u secrola pe stüdiane a cunsistença,

pe acapine escì a curpusità

prima de tastane ina gurà.

Poi u sentençia cun aria pretensiusa

che “lʼaudù lʼè de téra sgrutusa”

ma u retrugüstu, lʼè ben següru,

lʼè decisamente reginusu.

Vistu che i giüdissi di dui i sun cuntrastanti

a tastà se méte tüti i presenti.

Chi ne sustegne ün chi lʼautru puntela

de longu i süssa goti e i tarabela.

Mani man che a discüssiun a düra

u livelu intʼa bute ciancianin u cära

e ina ciave reginusa se vè spuntà

a ina stringa de coiru ben ligà.

Ovidio Bosio - Dialetto di Dolceacqua

Poesia che ha partecipato al Giannino Orengo 2018

ASSAGIATORI

Due assaggiatori alla ricerca del buon vino

salgono a Dolceacqua per il Vermentino

e dato che sono lì assaggiano il Rossese

per vedere se è vero del bene che se ne dice.

Offrono loro quello di Mandino

che in una chiesa aveva la sua cantina.

quello di Testalonga fanno loro assaggiare

che forse è il migliore, a loro pare.

il giro poi continua in unʼaltra cantina

visto che nei vicoli ce nʼè una grande quantità.

Ad ogni sosta ne bevono un bicchiere

cercando le qualità di ogni tipo.

il primo assaggiatore guarda il colore,

e lo annusa per sentirne lʼodore:

sa di liquirizia e rosa canina

mischiato alla puzza di piatti mal lavati della cantina

con tutto ciò il retrogusto dominante

è quello del cuoio, sicuramente.

Il secondo lo guarda in trasparenza

e lo scuote per studiarne la consistenza

e per esaminare anche la corposità

prima di assaggiarne un sorso.

Poi proclama con aria presuntuosa

che lʼodore è di terra argillosa

ma il retrogusto, ne è ben certo

è decisamente rugginoso.

Visto che i giudizi dei due non sono gli stessi

ad assaggiare si mettono tutti i presenti.

Chi ne sostiene uno chi appoggia lʼaltro

succhiandone un bicchiere dopo lʼaltro e ciarlando.

Mano a mano che la discussione dura

il livello della botte lentamente cala

ed una chiave arrugginita si vede spuntare

ad una stringa di cuoio ben legata.