CANDU U MÀ U S’ARRAGIA... di Roberto Rovelli

Rapallo - Autunno 2018

Créste giànche i labrégia e unde ìnsce de véntu

ch’i se scurre cume cavali sarvàighi incainài.

Int’in grixù ch’u cunfùnde celu e mà,

marusi asciarmài i se lansa acanì insci’â costa

scciupàndu int’i scögli cun semìglie de scciüma.

Prie, grava e giairui spantegài dapertütu.

Trussi, tòuře e bilùi astracài dae unde.

Strade inundàe, sprefundàe, scüràe.

Fundi e bitéghe alagàe; porte desgainàe.

Gussi lansài cun forsa int’i scögli

e amügliài cume rümenta int’ê ciaze

d’â füria acanìa d’a maregassa:

scciapài, ciavirài, afundài

o stirassài chissà dùve d’â curente.

–Che desastru!– s’aluménta e génte,

–U tempu u l’è propiu scangiàu; u l’è ciü gramu!–

i mungugna standu a mente tüti i dani capitài.

Ma urmai i son ani che l’omu u s’è scordàu

de réspeità a natüra e u mundu a l’avirùn;

mai cuntèntu, de lòngu ciü presentiùsu,

numìa de cunsciderà l’eféitu d’ê sòu açiùn.

Cuscì ancöi u nu’ pö fa autru che pregà

o püra giastemà, candu u mà u s’arragia..

Roberto Rovelli – Dialetto di La Mortola (Ventimiglia)

QUANDO IL MARE S’ARRABBIA...

Creste bianche agitano le onde gonfie di vento

che si rincorrono come cavalli selvaggi infuriati.

Nel grigiore che confonde cielo e mare,

cavalloni eccitati si slanciano implacabili sulla costa

scoppiando negli scogli con scintille di schiuma.

Pietre, ghiaia e grossi sassi disseminati dappertutto.

Ceppi, tavole e tronchi spiaggiati dalle onde.

Strade inondate, franate, erose.

Cantine e negozi allagati; porte scardinate.

Gozzi buttati con forza negli scogli

e ammucchiati come immondizia nelle spiaggie

dalla furia accanita della mareggiata:

spaccati, rovesciati, affondati

o trascinati chissà dove dalla corrente.

–Che disastro!– si lamenta la gente,

–Il tempo è proprio cambiato; è più cattivo!–

brontolano osservando tutti i danni avvenuti.

Ma oramai sono anni che l’uomo si è dimenticato

di rispettare la natura e il mondo attorno;

mai contento, sempre più arrogante,

invece di considerare l’effetto delle sue azioni.

Così oggi non può far altro che pregare

oppure bestemmiare, quando il mare s’arrabbia...