AREGÒRDI di Andreina Solari

Pâ vêi o fêo xêuo scentòu inta macàia da stæ

ónde émmo smarîo pe de lóngo

a speànsa do teu ritórno...

Mónto a crénn-a da scugêa 

e te vêgno a çercâ.

In sciô pròu azerbòu ’na brancâ de crôxe

arenbæ a-a solitùdine da gêxa.

Da-a resàcca do mâ a teu vôxe câa:

“Asùcala cómme a vêgne a vìtta!”  

Bocón amâo da colâ

magheu ciantòu inte ’na göga do cheu. 

Dàggo recàtto a-o mandìllo de tæra... sciâto o dô.

Ti me ninâvi in scöso... e frîgio o màrmou.

Ti me portâvi inte l'òrtixeu

de tra i garlézzi di roscigneu... e alêugo e scioî. 

Ti me porzéivi frûti dôsci pægi a l’amê

scìnn-a a quànde ò lasciòu o nîo

pe-o gîo da vìtta.

“Savéilo ónde t’ê finîa!”

Açéndo o lumìn... m’arecôvio in pitìn.

Sò che ninte’ ciù peu ascâdâ

a-a manêa de végge arénte a-o fogoâ

aregòrdi che mai poriö scordâ.

Te dìggo quéllo che pénso:

“N'é pasòu do ténpo!”

Reciòcca l'ôa, a l'aregòrda o disnâ.

Finìscio l’òraçión, vàddo vîa

pe màn a-a teu filozofîa:

“Asùcala cómme a vêgne a vìtta!”

Andreina Solari - Dialetto genovese di Leivi

RICORDI

Sembra ieri il crudele volo sfumato nella foschia d'estate

dove abbiamo smarrito per sempre

la speranza del tuo ritorno...

Salgo la dorsale della scogliera

e ti vengo a cercare.

Sul prato erboso una manciata di croci

accostata alla solitudine della chiesa.

Dalla risacca del mare la tua voce cara:

“Prendila come viene la vita!”

Boccone amaro da trangugiare

macigno sepolto in un rifugio del cuore.

Riassetto un fazzoletto di terra... rinnovo il dolore.

Mi cullavi in grembo... e lucido il marmo.

Mi portavi nell'orto

tra gorgheggi d’usignoli... e ripongo i fiori.

Mi porgevi frutti dolci come miele…

sino a quando ho lasciato il nido

per il giro della vita.

“Saperlo dove sei finita!”

Accendo il lumino... mi conforto un pochino.

So che nulla più può scaldare

quanto le veglie attorno al focolare

ricordi che mai potrò scordare.

Ti dico quello che penso:

“Ne è passato di tempo!”

Rintocca l'ora, rammenta il desinare.

Concludo la preghiera, me ne vado

per mano alla tua filosofia:

“Prendila come viene la vita!”